Har nechakim sanga jafoda rusux,

Men jafokashgadur vafoda rusux.

Bandi zulfungni kimki qilsa havas,

Anga vojibdur ibtiloda rusux.

Yuzi mir'otin orzu qilg'an

Kerak etsa ayon safoda rusux.

Soqiyo, ber qadahki, hijrondin

Jong'adur dard ila anoda rusux.

Sidq aro piri dayr rosixdur,

Lek zohidg'adur riyoda rusux.

Qilma ishq ichra da'vo, ar qilsang,

Zohir etkil bu mojaroda rusux.

Ey Navoiy vusul agar tilasang,

Ishq aro fosh qil fanoda rusux.