Ohim g'amingda gunbadi azxarni kuydurur,

Har uchquni falakda bir axtarni kuydurur.

Otashkada o'tida samandar topar hayot,

Ko'nglum o'ti valek samandarni kuydurur.

To qomatingg'a ne uchun o'xshatti bog'bon,

Ohim samumi sarv-u sanovbarni kuydurur.

Bir o'tdurur tanimdakim, oning harorati

Ko'nglakni kul qilur, dog'i bistarni kuydurur.

Derlarki, og'iz o't desa kuymas, vale bu oh

Chun sabt bo'lsa, xoma-yu daftarni kuydurur.

La'ling xayoli ko'ngluma o't soldi, vah, ko'rung,

Ne tez erur bu bodaki, sog'arni kuydurur.

Soqiy, g'am ichra o'ldi Navoiy — piyola tut

Kim g'ussalardin ushbu o't aksarni kuydurur.